Romans 11

1ARI, iet me i men inda: Kot kalikalar sapwilim a kan? O so! Pwe nai pil kisan men Israel, o kadaudok en Apraam, o kainok en Peniamin. 2Kot sota kalikalar sapwilim a kan, me a kotin piladar mas o. De komail sota asa, da me kisin likau masanier duen Elias ni a kadipa men Israel mon Kot masani: 3Main, irail kamelar sapwilim ar saukop akan, o karonk pasan sapwilim ar pei saraui kan, a nai ta me lua, a irail pil rapakin ia, pwen kame ia la. 4A da me Kot kotin sapenki i? Nai me kanikidi on ia ol isikid me so kelepuki on Paal. 5Nan iduen ansau wet: Luan me piladar akan mia pweki mak en Kot. 6A ma pweki mak, nan kaidin pweki wiawia kan; pwe ma iduen, mak solar pan mak. 7Ari, iaduen mepukat? Me men Israel raparapaki, re sota diaradar, a me piladar akan diaradar, a me tei kan kapitakailar. 8Duen a intinidier: Kot kotiki on irail nen en men mair, o por en mas akan, pwe ren der kilan wasa, o salon akan, pwe ren der ron wasa lao lel ran wet. 9O Dawid masani: Arail tepel en wiala insar parail, o litip arail, o kapup parail, o karia parail. 10Mas arail en rotorotala, pwe ren der kilan wasa, o irail en kakos pena kokolata. 11Ari, iet me i men inda: Irail dipikelekel pwen pupedi? O so! A pweki arail pupedi, en id kamaurela men liki kan, pwen kapopot kin irail do. 12Ari, ma arail pupedi id pai on sappa, a arail momalar id pai on men liki kan, ia wan pai, ma irail karos pan sapaledo! 13Pwe men liki komail, me i men padaki on, pwe nai wanporon en men liki kan, i men kaindinda ai dodok. 14Pwe ma i kak on, i pan kainon irail, me kit eu ni pali uduk pwe akai re ’rail en dorela. 15Pwe ma arail kalikilar id kalamalam maula sappa, arail kasapaledo so pan kamaurela san ren me melar akan? 16A ma kalap me saraui, plaua amas pil pan saraui; o ma kalaua me saraui, ra kan pil pan dueta; 17A ma ra kai tapenok san, a koe ni om wos mal id peus ion, ap ian nim pil en tuka o ian maurki kalaua, 18Koe ap der suaiki on ra kan! A ma koe suaiki on irail, kaidin koe me kin wa kalaua, a kalaua kin wa uk. 19Koe ap pan indada: Ra kan tapenok wei san, pwe i en id peus on. 20Me pun; soposon, me re tapenok kilar, a poson, me koe maur kila, koe der aklapalap a masak! 21Pwe ma Kot kotin muei san udan ra kan, kalaka, pwe ele a pil pan muei san uk! 22Ari, kilan kalanan o onion en Kot; onion on irail, me salonalar, a kalanan on uk, ma koe pan dadaurata a kalanan, a ma so, koe pil pan tapenok san. 23A pil irail, ma irail sota pan mimieta ni arail soposon, re ap pan peus sapal, pwe Kot kotin kak on kapure irail do. 24Pwe ma koe lepuk san ni tuka olip mal, ap peus sapal on tuka olip mau, a iaduen udan ra mau kan, re sota pan kak pur on udan ar tuka? 25Ri ai kan, i men, komail en lelapok ki kaponepon wet, pwe komail de aklolekon, duen apali en Israel me kapitakailar, lao lel ansaun irail me pilipildar ren men liki kan pwarador. 26Men Israel karos ap pan maureda, duen a intinidier: Amen pan kotido san Sion, me pan kawela karos me doo san Kot akan ren Iakop. 27Pwe iet ai inau on irail, i lao lapwa san irail dip arail akan. 28Iran ronamau irail me imwintiti pweki komail, a iran lipilipil irail me kompokepa kan pweki sam akan. 29Pwe Kot sota kin kalukila a pai en mak akan de me a kotin piladar. 30O duen komail, me pil sota poson Kot mas o, a met komail aleer mak, pweki arail soposon. 31Iduen irail me sota poson mak, me komail diaradar, iei me re pil sota diaradar mak en Kot. 32Pwe Kot me kotin kapata pena irail karos ni soposon, pwen mak pena on karos. 33O meid laud erpit en Kot o a kotin mani meakaros, sota me kak weweki a kadeik kan, de pameda al en a wiawia kan! 34Pwe is me asaer kupur en Kaun o, de is me padaki on i meakot? 35De is me ki on i meakot, pwen depuk on i? 36Pwe meakaros tapi san re a, o mia pweki i, o wiai on i, linan en ko on i kokolata! Amen.